Boni si ...........

El Veneto el ga na produtività e un svilupo industriale superiore a quelo del Giappone. Par capir, basta pensar che la produsion industriale dela sola provincia de Vicensa la xè superiore de quela de tuta la Grecia.

El Veneto el ga na densità demografica altisima e el livelo de tasasion el xè steso, se non de più, de quelo dei paesi scandinavi.

El risultato che ne deriva el xè un teritorio molto inquinà, con dificoltà de spostamento e servisi esensiali scadenti.

Però né el Giappone né i paesi scandinavi i xè ridoti così! Come mai?

Parché se se movemo co la machina semo sempre in coa? Parché i camion dele nostre fabriche impiega così tanto a consegnar i materiali? Parché, nonostante i contributi versadi la pension la sarà così basa e dovemo farghine una integrativa? Parché non ghè aiuti per le nostre dite in stò momento de crisi? Parché se prenotemo na visita medica specialistica al’USL dovemo aspetare mexi opure pagarse tuto da soli? Parché par trovar na piscina coperta dovemo far tanti chilometri? Parché el servizio scolastico el xè sempre carente e manca i schei sia par le attività alternative che per quele esensiali? Parché gli insegnanti i xè sempre pochi par coprir i posti e il tempo pieno non se pol farlo? Parché par un proceso sia penale, che sivile bisogna aspetar così tanto? Parché se gavemo un malato grave in casa quasi tutto xè sule nostre spale? Parché, in caso de vera necesità, i servisii sociali i pol far così poco?

Va ben, speremo tutti di non averghine mai de bisogno, ma la dura lege della vita, prima o dopo, la ne meterà de fronte ala realtà e par questo convien pensarghe prima.

Podemo veder che, xà nel Trentin, nonostante tuti i sò problemi, la va xà molto mejo che dale nostre parte, se po' andemo a veder i servisi che ghè xè nei paesi come el Giappone, opure la Svezia, vedemo che la tutela sociale e i aiuti i garantise na bona sicuresa e un otima qualità dela vita, non solo, ma le imprese le riesce a operar nel miliore dei modi.

Ma se nialtri  laoremo e produxemo piasè de lori e se paghemo tase pì de lori, come mai da nialtri no la xè così come da lori? Ando xèlo che gavemo sbaglià? Nialtri avemo sempre pensà a lavorar, ma dove xei finii e dove vai ancò i nostri schei?

Ma alora parché anche nialtri non dimandemo che i nostri schei i resta sul nostro teritorio come sucede da tute le altri parti de Europa?

Parché altrimenti i ne dixe che semo rasisti e egoisti! E nialtri ghe credemo e volemo dimostrar che nol xè vero e par questo se guardemo ben dal dimandar quel che ne vien!

El Veneto el xè la regione con pì asociasioni de volontariato, con el major numero de donatori de sangue e de organi, in parole povere, la xè la regione che dimostra e sotolineo dimostra la pì alta solidarietà, ben, a fronte de questo, coxa dixeli de nialtri? I dixe che semo el greto ed egoista Veneto, che pensa solo a laorar e a far schei! Ma i lo fà così ben, i ne le dixe così convinti, che ala fine ghè credemo dal bon!

Sìori, deso xè vegnù el momento de dir basta a stà colosale presa in giro, la globalixasion in ato e la nova realtà economica fata de import selvagio e delocalixasion produtiva no le ne permete de schersar ancora sul nostro futuro.

Veramente sio convinti che lasar andar el fruto del nostro laoro nele mani del governo sentrale voia dir un vero aiuto a ci ghe ne n'à de  bisogno? No fasime ridar! Lasar andare i nostri schei vol dir solo alimentare lo spreco de denaro publico e rendere imposibile qualsiasi controlo!

Partanto dimandemolo con determinasion, el xè un nostro dirito, ma xè anca un nostro dovere, dixemo basta a sprechi e diservizi, el Veneto el deve diventar libaro e indipendente,  come Slovacchia, Montenegro, Slovenia, Kosovo, ecc. ecc.…….