Che senso ga?

·       Me domando e tanti se domanda se ga senso in tel terso milenio, in tel novo mondo globalixà, in piena crixi economega parlar ancora de identità e popolo Veneto, de stato Veneto libaro e independente?

Tanti me risponde che, vista la corusion, l’incapaçità, i busi e i sprechi del stato ‘tajan… che nol rispeta gnanca la sò costitusion (art.114 e suc.) e el  xè governà da na majioransa che la se ritien al de sora e al de fora dele leji e dele regole (varda i pastroci elettorali)… in definitiva… no solo ga senso parlar de stato Veneto independente, ma l’independensa la xè na roba asolutamente idespensabile!

Altri me dixe che el stato ‘tajan in tei 150 ani dela sò curta storia ne ga portà crixi economeghe una drio l’altra, che ga provocào disperasion e emigrasioni de massa, el ga provocà dò guere mondiali, el sa ga reso responsabile, in nome e par conto de chela bandiera, de deportasioni e leji rasiali ….per cui no solo ga senso parlar di autodeterminasion del popolo Veneto, ma l’independensa xè una roba asolutamente indespensabile!!

·       Ma, vojo dir, al de là del’inevitabile smarsiume ‘tajan, gavaria senso comonque de parlar de independensa del stato Veneto?

E qua, par la resposta, bisogna vedar che genere de mondo volemo... se volemo el mondo dela cultura unega e del pensiero unego globale, del’uneforme e del’uneformità, del’omogeneo e del’omologà …. se volemo che el griso dela masificasion del pensiero e dela cultura el sia el nostro futuro … alora, in stò caso, non ga senso parlar de cultura e independensa veneta…

Se invese pensemo che le difarense culturali,le sia come le difarense de tenperadura, cioè energia vitale e idespensabile, se ne piaxe un mondo dai mile colori, dove ogni color xè un popolo co’ la propria cultura, co’ la propria storia, col proprio stato… belo parché difarente dai altri  …  e sté “biodiversità” le ne piaxe e le ne fa capir quando granda e bela sia l’umanità e volemo preservarle, par quanto posibile… Benon! Alora, no solo ga senso parlar de autodeterminasione del popolo Veneto, ma l’independensa xè una roba asolutamente indespensabile!!

·       Ma, amesso tuto, vegnendo al ponto pì delicado, ga senso dal ponto de vista economego parlar de independensa Veneta?

Se demo n’òcio ai “veci” stati, de stanpo napoleonico, in tei secoli scorsi, coi dazi ale dogane e comercio posibile solo drento i propri confini.. vedemo che i jera costreti, par trovar sbochi comerciali, a çercar de continuo de espandar i propri confini e a çercar nove colonie da sfrutar….. co la conseguensa che le guere, per motivi economeghi, le jeraall’ordene del jiorno… adeso, invece, con la globalixasion e la libartà de circolasion dele merci e dele persone, el ris-cio de guere economeghe xè tanto calà, ma i “veci” stati, come l’Itaja, grandi carosoni burocrateghi, contenidori de realtà tanto difarenti…. non i riesse a dar le risposte, ai imprendidori e ai lavoradori, che la competision economega globale rla domanda, mentre i stati pì piccoli, culturalmente ed economegamente omogenei, i stà risorgendo, noialtri, invese, ris-cemo el falimento e la bancarota, partanto non solo ga senso parlar de autodeterminasion del popolo Veneto, ma l’independensa xè na roba assolutamente indespensabile!!