La Padania, el pèxo nemigo del Veneto

In prinsipio, la Padania, stato federale o confederale, l'avaria dovuo garantir autonomia, indipendensa e autogoverno ale regioni del nord come Veneto, Lombardia, Piemonte ecc. ecc.

I èra previste poche competense al governo sentrale, proprio el minimo indispensabile, e tuti i poteri ale regioni che le saria diventè dei veri e propri stati, almanco così i nà contà.

Però, dopo, nonostante el tramonto dela ipotesi secesionista, el progeto Padania el xè restà nei propositi dela lega nord.

A stò punto, però, se la Padania non la sarà un stato coxa sarà? Forse 'na grande regione?

Par proprio de si!

E come la nasarà? Dala fusion dele regioni del nord! Visto che no ghè spasio par istitusioni intermedie tra Stato e Regione, xè ciaro che l’unica posibilità de realixar la Padania xè qela de scanselar le regioni, o mejo, fonderle insieme!

Sta roba non risolverà i problemi de funsionamento dela cosa publica e laserà irisolti i nostri problemi economici, parché l'utopia Padana la sarà na’granda regione sentralista che scanselerà quele esistenti!

Stò particolare, però, nol vien spiegà ben, tanto che quei che lavora par realixar la Padania va dixendo, convinti, de salvaguardar l’identità Veneta, mentre i se da da far par scancelarla!

Nisun n'à mai spiegà, né el pol farlo, stà contradision; infati par crear l’identità Padana bisogna sostituirla a quela Veneta, come par crear la Padania bisogna rinunciar al Veneto: matematico!

Ma se sta roba no i ne la dita, vol dir che, anca sta olta, i n'à fregà, par stì motivi el progeto Padania el pol esar ciamà el pexò nemigo del Veneto, la Padania xè contro el popolo e l’identità Veneta!

Purtropo migliaia de persone le stà laorando a stò progeto convinte de salvaguardar l’identità Veneta e invece i la stà afosando……. 
penseghe xente  ..… penseghe…..