Un po' de storia Veneta......

La storia del popolo Veneto la scominsia ala fine del neolitico, xà nel’età del fèro (sirca 800 A.C.) dale nostre parte se laorava alacremente, par capirse, quando Romolo e Remo no i jera gnancora nati.

Significativi reperti archeologici e anca vaselame finemente laorà oltre a importanti necropoli le xè stè ritrovè nel nostro teritorio, a testimoniansa dela siviltà Veneta del periodo.

Dedicai prevalentemente al comercio, sucesivamente i Veneti i ga mantegnù sempre raporti de amicisia con i Romani e i xè stè inglobè ne l’impero paçificamente, godendo de ampie autonomie, i ga formà la regio ciamà “La Venetia”.

Po' anca i Barbari i se gà catà ben in Veneto; difati el famoso re barbaro Teodorico el sà stabilio a Verona e el la gà fata diventar la capitale del sò regno.

Pasà l’epoca dele invasioni barbariche e el breve periodo dei comuni medievali, finalmente el popolo Veneto el ritrova unità e indipendensa nela Serenisima Veneta Republica, diventà incontrastada dominatrice del mediteraneo.

Lo stato Veneto, nel momento del sò masimo splendor, el se estendeva da Bergamo fin a Cipro, passando par l’Istria, le coste orientali del’Adriatico e le isole greche, la lengua Veneta la jera quela dele ambasciate e la vegnea doparà nei scambi internasionali dai stati europei e confinanti, tuto questo el xè durà par çirca mile ani fin al arivo de Napoleon e dele armate francesi.

Con l’invasion francese xè scominsià un periodo difisile par el popolo Veneto, dovuo ai sachegi e a na forte crisi economica, dopo, el Veneto el fu cedù al’Austria e, dopo,  el xè stà sotomeso al regno italico dei sabaudi.

Purtropo da alora nialtri Veneti no gavemo pì avudo né autonomia né indipendensa, adirittura la nostra storia la xè stà scanselà dai libri de testo de scòla la storia de Venexia la xè stà ridota a cea republica marinara, non ghè studi aprofondii del teritorio Veneto né in epoca antica, né in epoca moderna (controlar par credar!).

De solito se preocupemo quando na specie animale la se estingue, opure quando na specie vegetale la xè in pericolo, ma in sto caso asistemo impasibili ala cancelasion culturale del nostro popolo sensa batar ciglia!

La cancelasion la xè fata sensa usar metodi cruenti, ma in modo subdolo con un laoro de meticolosa eliminasion da tuti i testi scolastici, e non solo da quei, de qualsiasi cosa che posa risvejar la nostra identità, e po', se parlemo el Veneto, i ne considera grexi e boari, se se comportemo da Veneti vegnemo derisi e sbefegiai.

Ma a chi ghe faxemo tanta paura, visto che i ne vol eliminar così?

Non lo so, so che nisun de nialtr deve parmetar che questo suceda!

Le legi internasionali e quele 'tajane le ne da el dirito de dimandar e otegner la nostra autodeterminasion, la nostra autonomia, la nostra indipendensa non lasemose scapar stà oportunità, daxine la forsa par farlo!